Энэхүү дүн шинжилгээг 2009 оны 12 дугаар сарын 21-ээс 2010 оны 1 дүгээр сарын 25-ны өдрүүдэд Үндэсний Аудитын газрын Гүйцэтгэлийн аудитын болон Бодлогын газар, аймаг, нийслэлийн аудитын газрын аудитор, шинжээчид хамтран гүйцэтгэсэн.

Дүн шинжилгээний зорилт Монгол улсын 2010 оны төсвийн хөрөнгө оруулалтын төлөвлөгөөг үндэслэлтэй боловсруулж, баталсан эсэхэд дүн шинжилгээ хийх, дүнг УИХ-д танилцуулахад чиглэгдсэн. Дээрх зорилтыг хангахын тулд дараахь чиглэлээр шинжилгээ хийсэн. Үүнд:

• Хөрөнгө оруулалтын төсөл, арга хэмжээний бүтэц, зориулалт;
• Хөрөнгө оруулалтын төсөл, арга хэмжээнүүд улс, орон нутаг, салбарын бодлого, хэрэгцээ шаардлагад нийцсэн эсэх;
• Хөрөнгө оруулалтын төлөвлөгөөг зохих ёсоор боловсруулж, өргөн мэдүүлсэн эсэх;
• Хөрөнгө оруулалтын төсөл, арга хэмжээнүүд төлөвлөсөн ёсоор хэрэгжих боломжтой эсэх.

Монгол улсын 2010 оны төсвийн тухай хуулийн нэгдүгээр хавсралтаар баталсан “Монгол улсын төсвийн хөрөнгөөр 2010 онд санхүүжүүлэх хөрөнгө оруулалтын төсөл, арга хэмжээ, барилга байгууламжийн жагсаалт”, мөн хуулийн 2 дугаар хавсралтаар баталсан “Бүс, орон нутгийн хөгжлийг дэмжих чиглэлээр улсын төсвийн хөрөнгөөр 2010 онд санхүүжүүлэх хөрөнгө оруулалтын төсөл, арга хэмжээ, барилга, байгууламжийн жагсаалт”-д тусгагдсан хөрөнгө оруулалтын төсөл, арга хэмжээ, барилга байгууламжийн ажлыг хариуцан зохион байгуулах Төсвийн ерөнхийлөн захирагч, Ерөнхий менежер буюу холбогдох яам, агентлаг, төрийн болон төсвийн бусад байгууллагууд, орон нутгийн төсвийн эрх захирагч нар энэхүү дүн шинжилгээний ажилд хамрагдсан.

Судалгааны дүнд үндэслэн дараах дүгнэлтийг гаргасан байна. Үүнд:

1. Улсын төсвийн хөрөнгөөр болон бүс нутгийн хөгжлийг дэмжих чиглэлээр хэрэгжих хөрөнгө оруулалтын төсөл, арга хэмжээний дийлэнх ихэнх нь улс, орон нутаг, салбарын бодлого, хэтийн төлөвлөгөө, хэрэгцээ шаардлагад нийцэж байгаа боловч зарим төсөл, арга хэмжээ тэр бүр нийцээгүй байна.
2. Хөрөнгө оруулалтын төлөвлөгөө боловсруулахад баримтлах бодлого, зарчмыг бүрэн баримтлаагүй, хийгдвэл зохих үе шатны ажлууд бүрэн гүйцэд хийгдээгүйгээс зураг төсөл нь бэлэн биш, захиалагч, ашиглагч, хүчин чадал, зориулалт нь тодорхойгүй, хугацаандаа хэрэгжих боломж муутай төсөл, арга хэмжээ хөрөнгө оруулалтын төлөвлөгөөнд тусгагдаж батлагдсан тохиолдол цөөнгүй байна.
3. Зураг төслийн талаархи Барилгын тухай хуулийн холбогдох шаардлагуудыг улсын төсвийн хөрөнгөөр санхүүжүүлэх барилга байгууламж, их засварын ажлын дийлэнх нь хангасан бол бүс, орон нутгийн хөгжлийг дэмжих чиглэлээр улсын төсвөөс санхүүжүүлэх барилга, байгууламж, их засварын ажлын ихэнх нь хангаагүй байна.
4. Бүс, орон нутгийн хөгжлийг дэмжих чиглэлээр улсын төсвийн хөрөнгөөр 2010 онд санхүүжүүлэх хөрөнгө оруулалтын төсөл, арга хэмжээнүүдийн нилээд нь орон нутагт анхан шатны нэгжүүдэд чиглэгдсэн боловч гол төлөв жижиг төсөл, арга хэмжээг санхүүжүүлэх болж байгаагаас үр дүнг нь эргэн тооцох боломж муутай, хөрөнгө оруулалтын шинж чанартай бус зарим төсөл, арга хэмжээ төлөвлөгдсөн байна.
5. Төсвийг Засгийн газар бүрдүүлж, Засаг дарга зарцуулах болж байгаа нь эрх зүйн хувьд хир зэрэг үндэслэлтэйг эргэж үзэх нь зүйтэй.