Бүгд Найрамдах Солонгос Улс /БНСУ/-ын Засгийн газраас Монгол Улсад үзүүлэх буцалтгүй тусламжийн хүрээнд “Булган аймгийн Баяннуур сумын нуурыг сэргээх төсөл”-ийг хэрэгжүүлэхээр хоёр тал төслийн хэрэгжих цар хүрээ болон хоёр талын гүйцэтгэх үүргийг тусгасан Хэлэлцээрийн протокол (Record of Discussion)-д 2010 оны 03-р сарын 12-ны өдөр гарын үсэг зурав.

Төслийн санхүүжилт 1,5 сая ам доллар бөгөөд уг Хэлэлцээрийн протоколд Монголын талаас Байгаль орчин, аялал жуулчлалын яамны Төрийн нарийн бичгийн дарга Н.Батсуурь, Сангийн яамны Зээл, тусламжийн бодлого, хамтын ажиллагааны газрын дарга Б.Хүрэнбаатар болон Солонгосын талаас БНСУ-ын Олон Улсын Хамтын Ажиллагааны Байгууллага (KOICA)-ын Монгол дахь Суурин төлөөлөгч Ли Дунг Гү гарын үсэг зурж баталгаажууллаа.  

Энэхүү төсөл нь Монгол Солонгосын “Зүүн Азийн цаг уурын түншлэл төсөл”-ийн хүрээнд хэрэгжих бөгөөд уг төслийн гол зорилго нь Говьд ногоон бүс байгуулах явдал юм. Уг төсөл нь дэвшилтэд биотехнологи ашиглан ганд тэсвэртэй ургамал тариалалтыг нэмэгдүүлэх, цөлжилтөөс урьдчилан сэргийлэх зэрэг боломжтой арга замыг хөгжүүлнэ.